Криптовалютын салбарын хувьд 2025 он хүнд жил байлаа. Дижитал хөрөнгийн хулгайн хэмжээ тасралтгүй өссөөр, криптовалютын аюулгүй байдалд ноцтой сорилт тулгарсаар байна.
Шинэ судалгаагаар крипто хулгайн чиг хандлагад дөрвөн гол өөрчлөлт ажиглагдсан байна. Үүнд Хойд Солонгос улс гол крипто халдлага үйлдэгч хэвээр байгаа бөгөөд төвлөрсөн крипто платформуудад чиглэсэн халдлага нь улам их хохирол учруулах болсон. Мөн хувийн крипто данс руу болон төвлөрөлгүй санхүү (DeFi)-рүү чиглэсэн халдлага бүртгэгдсэн байна.
2025 оны нэгдүгээр сараас арванхоёрдугаар сарын эхэн хүртэл нийт 3.4 тэрбум ам.долларын криптовалют хулгайд алдагджээ. Үүний 1.5 тэрбум ам.доллар нь зөвхөн хоёрдугаар сард "Bybit" биржид гарсан халдлагын улмаас алдагдсан юм.
Хувийн крипто данс руу халдах хулгай сүүлийн жилүүдэд огцом өссөн байна. 2022 онд нийт крипто хулгайн 7.3 хувь нь хувийн данснаас алдсан хэргүүд байсан бол 2024 онд 44 хувь болтлоо өссөн байв. Харин 2025 онд "Bybit"-ийн томоохон халдлага гараагүй бол хувийн данснаас алдсан хөрөнгө нийт хохирлын 37 хувийг эзлэх байв.
Хакерууд хувийн түлхүүр, гүйлгээг баталгаажуулах системийг онилж, өндөр түвшний халдлага үйлдэж байна. Мэргэжлийн аюулгүй байдлын баг, “cold wallet” хамгаалалттай байсан ч эдгээр платформууд халдлагад өртөх эрсдэлтэй хэвээр байна. 2025 оны эхний улиралд төвлөрсөн үйлчилгээ рүү чиглэсэн халдлагууд нийт хулгайн 88 хувийг эзэлжээ. Халдагчид ихэвчлэн гуравдагч талын дансны системийг эсвэл хууль ёсны баталгаажуулагчдыг вирустэй болгож халддаг байна.
Криптовалютын аюулгүй байдал зарим талаар сайжирч байгаа ч, өндөр түвшний хулгай үргэлжилж буй нь халдагчид олон төрлийн аргаар дижитал хөрөнгийг хууль бусаар олж авах боломжтой хэвээр байгааг харуулж байна.
